جواب عن كل اسئلتكم بخصوص معاهد الممرضين والممرضات
شفت عدد كبير كيسولو على التمريض، هادو غاع المعلومات عليهوم.. وحظ موفق 💙🍂
شنوهي ل ISPITS
لISPITS هو المعهد العالي للمهن التمريضية و تقنيات الصحة، مؤسسة تعليم عالي د الدولة غير تابعة للجامعة. فالتأطير ديالها تتخضع لوزارة الصحة و وزارة التعليم العالي و تكوين الأطر و البحث العلمي. كانت تتعرف سابقا ب IFCS و ف 2013 تم اعتماد نظام LMD (Licence, Master, Doctorat) فيها. تغير الاسم و نظام الدراسة إلى نظام الوحدات (système modulaire)، والدراسة فالسلك الأساسي كدوم 3 سنوات، كتحصل فيها على الإجازة المهنية فالعلاجات التمريضية و تقنيات الصحة حسب التخصص لي درتي خلال التكوين. هاد الإجازة كتمكنك من ولوج الوظيفة العمومية و سوق الشغل، ويمكن لك تكمل بها الدراسة ديالك فالماستر سواء داخل المعهد أو فالجامعات المغربية.
كيفاش تيديرو دخلو ل ISPITS
الايسبيتس هو من المعاهد الوطنية دات الاستقطاب المحدود، يعني الولوج ليها كيتطلب مباراة لي كدوز من مجموعة من المراحل:
- الانتقاء القبلي
- الاختبار الكتابي
- Test d'aptitude
التخصصات
فالايسبيتس كاين مجموعة ديال التخصصات كتدخل فشعب:
شعبة العلاجات التمريضية (6 تخصصات)
- ممرض متعدد الإختصاصات
- ممرض في التخدير و الإنعاش
- ممرض في الصحة النفسية
- ممرض في العلاجات الإستعجالية و العناية المركزة
- ممرض في علاجات المواليد
- ممرض في صحة الأسرة و الصحة الجماعاتية
شعبة تقنيات الصحة (7 تخصصات)
- الإحصائيات الصحية
- صيانة المعدات البيوطبية
- المختبر
- الأشعة
- الحمية و التغذية
- محضر في الصيدلية
- الصحة و البيئة
شعبة الترويض و إعادة التأهيل (6 تخصصات)
- مقوم البصر
- مصحح النطق
- نفساني حركي
- مروض طبي
- واضع أجهزة استبدال الأعضاء
- الترويض بالعمل
شعبة القابلة
فيها تخصص واحد: قابلة
شعبة المساعدة في المجال الطبي و الاجتماعي
فيها تخصص واحد: مساعد اجتماعي
عند التخرج جميع الشعب عندها نفس الديپلوم، عند التوظيف كيكون عندنا نفس السلم و نفس الخلصة، الاختلاف فقط فالمواد لي كنقراو خلال التكوين حسب التخصص. متلا المختبر ما غيقراوش المواد ديال الأشعة حيت ما غيحتاجوهاش.
ادا فاختيار الشعبة، ختار الشعبة لي كتميل لها و حسب الطموحات ديالك.
شنوهي العتبة ديال الولوج للمعهد
العتبة ما يمكنش تتوقعها، حيت كتختلف من معهد لآخر.
